~~~|| Gottfried von Neifen || Autoren G || LiberLey Index ||~~~


GOTTFRIED VON NEIFEN

nachweisbar zwischen 1234 und 1255

Wer gesach ie wunneklicher me den svessen meigen?

Wer gesach ie wunneklicher me den svessen meigen?
wer gesach ie bas bekleit den walt vnd ouch die wunnenklichen heide?
wer gehort ie bas dv kleinen vogellin gesingen
gegen der wunneklichen wunne in maniger svsser, wunneklicher wise?
da gegen froeit sich manig herze, wan das mine alleine.
da mvos iemer trurig sin, es wende ir wiplich gvete,
dú mich senden mit gewalde lange her betwungen hat.

O we, trútelehter lip, sol ich alsvs verderben?
owe, spilnter ogen schin! hei, mvnt gevar nach wunneklichen rosen!
herzen trut, ir wuestet an mir úwer vriges eigen
wie zimt wibes gvete das, ob ich in senden orgen svs verdirbe?
liebú frowe, ich habe iv lange her gedienet von kinde,
des lat mich geniessen! seht, so wirde ich froeideriche.
ob des niht geschiht, so mvos min spilende froeide ein ende han.

Ir vil wunnenklichen wip, ir wolgemveten leigen,
wúnschent, da mis herzen trut mich von den senelichen sorgen scheide!
so bitte ich die gvoten, das sie lâsse mir gelingen
svesse minne, ob das geschiht, dar vmbe ich dine werden tvgende prise.
minne, dv weist wol, es ist dú liebe, die ich da meine
hilf, das mir dú here troste min gemvete!
ob des niht geschiht, so wirt mir sender sorgen niemer rat.

O we, minne, sol ich niht den roten kvs erwerben
vnd svessen vmbevank; dar zuo ir minneklichen lip, den losen?
suessv minne, maht dv herzeliep an mir erzeigen?
nv was treit dich für, ob ich nah der vil herzelieben in liebe stirbe?
minne, ich mvos verderben, ob ich niht die froeide vinde.
ach, dur got, vil selig wib, noch helfent helfecliche!
svuessú minne, frage si dur got, was ich ir habe getan!


© Helmut Schulze, 2006